Thursday, December 29, 2011

بدي احكي !

اجا علي بالي من كم يوم اكتب ، جبت دفتر بس خليته فاضي ، ما بعرف لايمتى رح يضل فاضي ، بس قلت بدي اجرب تويتر
حسيت انه مكاني مش كتير صح هناك ، 114 حرف ما بكفوا لبنت بتحب الحكي زيي ، و ما بهمني كتير انه حدا من الناس اللي بعرفها بالحقيقة تعرف كل اسراري
كتبت هون اليوم لأني مخنوقة، بطلت عارفة لمين اشكي ، مش فارقة مين يقرأني هون ولا فاقة حدا يهديني ، بس يمكن لما تفرج ارجع اقرا و احمد ربي دائما و ابدا على كل اشي اعطاني اياه
مش عارفة عن مين اكتب ؟؟ كنت دايما احكيلكم عنه ، و خلصت موضوعه هون ،
اجا بعده حدا تاني و وقفت كتابة لانه زهقت اكتب عنهم و اشرككم اخبارهم ، حكتلي صاحبة الي عمرها 28 سنة اتزوجت جديد قالتلي ( بكرة ببطل عندك طاقة لاشي ولا نفس )
شكله اجا بكرة اسرع من اليوم و شكله طاقتي خلصت من زمان
شو بدي احكي كمان ؟ احكيلكم عن اني صار عمري 26 و بلشت قصص العرسان و مشاكلهم ؟
احكيلكم انه صار عمري 26 و انا بشغلي لساتني مكاني ؟
احكيلكم عنه و اديش غير فيي اشياء و اديش حياتي حتى مع اهلي تغيرت ؟
احكيلكم عنها ، اديش عم بتدايقني كل يوم و اديش مش قادرة احكي عنها لحدا لانها هي المفروض اكتر وحدة تسمعني !!!
احكيلكم عن 2011 اديش كانت غريبة ؟ و سخيفة ؟ و ما رح يمرء سنة متلها ؟
نسيت لشو انا جاي اكتب اصلا ، يلا بلكي زبطت المرة الجاي !!!