جولة بالمكتبة

صارلي فترة جاي عبالي اقرأ كتاب بس مش عارفة شو ، انا من النوع اللي بحب اقرأ كتاب معروف او يكون "اكثر مبيعاً" لأنه اكتر من مرة اتمقلب بكتب ما حدا بعرف عنها اشي !!

المهم امبارح ما كان في عندي اشي ، حملت حالي و رحت على جرير "ليست مجرد مكتبة" و مشيت بين هالكتب ، طبعا انا نفسي من زمان اقرا كتاب the alchimst و دايما بفتش عليه بفيرجن ميجا ستور ما بلاقيه ، المهم لاقيته امبارح و معه المجموعة الكاملة ، بس انا عندي منهم كتابين فبس اشيريت الكتاب لحاله , سعره 52 ريال يعني ما يعادل 10 دنانير اردنية ، والله سعره منيح مش عارفة ليش الناس ما بتقرأ !!!

المهم ضليتني ماشية بصف كتب الانجليوي ، لقيت في كتير كتب "الاكثر مبيعا" و شكلها انترستنغ تو رييد !! بس خفت اشتري اشي و اكسل اقراه بس قررت ارجعلهم ز

خلصت من قسم الانجليزي و قلت باخد جولة بالعربي ، ولا اشي معروف ولا في قائمة الاكثر مبيعا ولا حتى مرتبينهم حسب الكاتب كمان !!! والله عيب ، الواحد ببطل اله نفس يقرأ !!

لاحظت انه اسم أحلام مش موجود ابدا ، كنت عم بفتش على كتابها "نسيان.كوم" حدا من اصدقائي نصحني فيه ، علاجا لحالتي بس رحت سألت المسؤول عن الكتب هناك قاللي ما عنا احلام قلتله يعني خلصت ؟ قاللي لأ عمرنا ما جبنا كتب الها !!! صح غريب ؟؟

المهم نزلت عالكاشير و انا بحكي بعقلي "ليست مجرد مكتبة" !!! و انا كللي دهشة من اللي شفته جوا ...