خالتي شفيقة ...

هي بتكون اخت امي اللزم ، امبارح تزكرتها كتير و هلأ بتعرفوا ليش اجا عبالي احكيلكم عنها

خالتي من اقوى النساء اللي عرفتهم بحياتي ، بحس حياتها كلها مغامرات و قصص شيقة ، هي كانت اول امراة بالاردن بتسوق شاحنة معها كل انواع رخص السواقة و مرَة عملوا معها مقابلة عالتلفزيون بالتمنينات عشان هالموضوع.

دايما بتذكر من و نحنا صغار كنا نخاف منها احتراما بس بنحبها كتير و بنحب نسمع قصصها ، كانت تعليقاتها على اي اشي فعَالة و قوية بس من باب الصراحة و تحسين الشيء للأفضل .

من خمس سنين تقريباً تعبت الخالة شفيقة و دخلت عالمستشفى تعمل عملية و نحنا خفنا عليها لانها حتى و هي مريضة ما كانت تحب تبين اشي او تعب ، بس هالمرة الموضوع جدي و في عملية و مستشفى ، رحنا نزورها كانت نايمة و صوت نفسها بدل على تعبها ، كانت اول مرة احس بضعفها ، كنت بجامعة سنة تانية حسب ما بتزكر ، بس نفسيا اول ما شفتها هيك ضليت صفنانة فيها مش قادرة استوعب ، و بلشت ادمع

المهم فاقت و بلشنا نحكي معها و هي يادوب قادرة تحكي ، بعدين قالتلي امشي معي عالحمام (كوني كنت اصغر القاعدين ) بلشت تسند علي و على ابنها و تمشي شوي شوي انا هون فرطت و ما قدرت امسك حالي من العياط ، صارت هي تضحك و تقلي بس هبل و من هالحكي ، عرفنا بعدها انه معها سرطان بعيدن عنكم ، اله معها 10 سنين بس كانه بلش ورم حميد بعدين صار سرطان ، مش كتير فهمت القصة .

المهم صارت خالتي كل فترة و فترة تدخل المستشفى و من عملية للتانية و كل مرة ينجح اشي و يتغير اشي تاني ، بعدها بسنتين قررت تطلع حج لأنها كانت خايفة لا سمح الله ما تكمل و تضل بنفسها ، يالله شو انها رهيبة هالبني ادمة ، الله يحميها عنجد ، بعدها بشوي جوزت ابنها ، و كانت بعرسه ترقص مع الصبايا نقلها اقعدي تقول ما بدي هادا اخر ولد و بدي افرح فيه ، و كنا بس نروح عندها ما ترضى الا هي تضَيف و تقوم و تروح و تيجي ، تصير تحكي انا المريضة مش انتوا و بعرف حالي منيح !!!

من جديد بس و يمكن من شهرين عرفنا انه المرض خف كتيير و في اورام عم تختفي نهائيا من جسمها ، سبحان الله كنت دايما اسمع انه المرض نفسية و خصوصا السرطان ، بس جد هي كانت اقوى من المرض و اتحدت كل اشي ...

.اللي ذكرني بالقصة انه انا دايما بحس حالي تعبانة و ما الي نفس اعمل اشي ، و حسيت حالي اديش سخيفة بس اتزكرت هالانسانة الجبًارة

الله يحميها و يشفي مرضانا اجمعين.