اليوم خطر على بالي ارجع اقرا بوست قديم ، مش عارفة بظن عمره سنة تقريبا ، كان أحمد اخو حازم توفى بوقتها و انا حكيت معه علشان اطمن على صاحبنا ، كان يومها حسب ما بتذكر (و قبل ما اقرا البوست) احككيله اشتقتلك أد الدنيا
مع انه كان بوقتها في حدا تاني كان بحاول يفوت بحياتي ، عمري ما حكيت عنه هون ، يمكن لانه عمري ما تخيلت اوصل لهاي المرحلة
تخيلوا انه خلال اقل من سنة يصير معنا احداث كتيرة كان ممكن تخلص باقل من شهر او يمكن اسبوع او حتي 24 ساعة
اجا عبالي افضفض ، و انا دايما بحب احكي كل اشي ، انا عبارة عن كتاب مقروء ، ببين علي الزعل على طول لاني دايما بضحك ، مع اني كمان دايما بشكي بس برضى بسرعة
اليوم بطلت قادرة اشكي ، حتى لحالي ، مش عارفة شو عم بصير الصراحة ، مش عارفة ليش كل اشي عم بتلخبط بدقيقة مع انه بكون حاسة انه اموري ما في احسن منها من قبل 5 دقايق بس
زهقت من الشكوى و من البكى ، زهقت من كترة الاحداث اللي بتصير معي و في اسرع ما يكون !!دايما عم بفتش على اشي جديد بس انا نفسي مش عارفة شو هو
"تعبت من "يللا ما بدنا نفرح فيكي" ؟؟ "يللا ما في حواليكي حدا " أو أهبل تعليق "يللا شديلنا حيلك
لا في حدا و راح من ورا نصيحة كل حدا و أي حدا عم بتدخل بحياتي ، من ورا كل حدا عملي اكتئاب بس مجرد انه نفسي اشكي ، كان في حدا عمري ما حكيت عنه لانه المثل بقول "داري على شمعتك تقيد" و انا شمعتي طفت من قيل ما تقيد و لسة ما كمل الموضوع السنة
اليوم انا ضعيفة و اضعف من اني حتى اكمل كتابة لأني بطلت قادرة احدد من وين المشكلة و كيف اكمل
....
3 Openions !!!:
أسوأ مرحله ممكنه بس معلش
لساتك عايشه وصغيرة
وخلي الناس تخبط راسها بالحيط!!
حبيبتي
عند كل شمعه بتنطفي بحياتنا بنحس انّا مش قادرين نستمر و ان في اشي جواتنا احنا كمان انطفا و ان كل الابواب تسكرت بوجهنا و لكن الا ما يفتح باب تاني بس احنا بناخد وقت لنشوفه
ان شاء الله ما تطولي وانتي لسا مش شايفه هالباب اللي انفتح وتأكدي لو كان في الباب القديم خير لما تسكر .... انسي العالم و اعملي اللي انت بدك اياه
Post a Comment